Hindistanda qidalanmaq üçün kəndə daxil olan nəhəng piton ilanı sakinlərə çətin anlar yaşadıb. Sürünəni yaxalamaq üçün hərəkətə keçən hindlilər ilanı asanlıqla ram edə bilməyiblər.
Piton ilanı dövrəyə alan sakinlər onu tutaraq öldürməyə çalışıblar. Ancaq müqavimət göstərən sürünən kəndlilərin əlindən sağ çıxa bilib. Bəzi sakinlərin hətta piton ilanla selfi çəkdirməyə çalışması da diqqət çəkib.
Yerli medianın məlumatına görə kəndlilərin heyvanlarına göz dikən ilanın uzunluğu 5 metrdən çox olub. Bu cür nəhəng ilan hətta uşaqları da asanlıqla udmağa qadirdir. Onu kənddən uzaqlaşdırmaqla təhlükəni sovuşduran hindlilər bu cür halların baş verməməsi üçün əlaqədar qurumların hərəkətə keçməsini tələb ediblər.
Mütəxəssislərin sözlərinə görə, əslində yırtıcı heyvanların və ilanların yaşayış məskənlərinə üz tutmasına meşələrin qırılması və yaşayış massivlərinin sürətlə genişlənməsi səbəb olur. Eyni zamanda, heyvanlar öz məkanlarında qida tapa bilmədikləri səbəbindən də yaşayış məskənlərinə üz tuturlar./atv.az/
