Mərkəzi Bankın sədri Elman Rüstəmov Avropa Yenidənqurma və İnkişaf Bankının (AYİB) prezidenti Sumo Çakrabartinin rəhbərlik etdiyi nümayəndə heyətini qəbul edib.
Qazeta.info Mərkəzi Banka istinadla bildirir ki, Görüş zamanı Azərbaycanın bank sektorunda AYİB-in aktiv iştirakı və əməkdaşlığı, həmçinin bank sisteminin davamlı inkişafına dair məsələlər müzakirə olunub.
Mərkəzi Bankla AYİB arasında əlaqələri yüksək qiymətləndirən E.Rüstəmov AYİB-in Azərbaycan bank sistemi ilə əməkdaşlığı çərçivəsində bir sıra layihələrin uğurla həyata keçirildiyini qeyd edib. O, nümayəndə heyətinə Azərbaycanın makroiqtisadi göstəriciləri, iqtisadi artım, iqtisadiyyatın şaxələnməsi, qeyri-neft sektorunun davamlı inkişafı, maliyyə, o cümlədən bank sektorunun iqtisadi inkişafda rolunun artırılmasına dair ətraflı məlumat verərək, Azərbaycan bank sektorunda vəziyyətin sabit olduğunu, sektorun kifayət qədər kapitallaşdığını və kapital adekvatlığının yüksək olduğunu nəzərə çatdırıb.
E. Rüstəmov Azərbaycanın AYİB ilə əməkdaşlığının əhəmiyyətini vurğulayıb. O, qeyd etdi ki, AYİB ilə əməkdaşlığın artıq yeni strateji istiqamətləri ortaya çıxır və bütün bu istiqamətlər qeyri-neft sektorunda investisiya fəallığının daha da artırılması və şaxələnmənin sürətlənməsinə yönəlmişdir. AYİB ilə Ölkə üzrə Strategiyasında qeyri-neft sektorunun inkişafına xüsusi önəm verilməli, bu sahədə maliyyələşmə və sərmayələrin həcmi artırılmalıdır.
Görüşdə S.Çakrabarti təmsil etdiyi qurumun ölkəmizlə əməkdaşlıqdan məmnun olduğunu bildirərək bu əlaqələrin bu gün də çox uğurla davam etdiyini qeyd edib. O, ölkədə hazırkı sosial-iqtisadi inkişaf strategiyasının realizasiyasında hökumətlə AYİB arasında sıx əməkdaşlığın vacibliyini vurğuladı. AYİB-in Ölkə üzrə Strategiyası çərçivəsində ölkədə qeyri – neft sektorunun inkişafı ilə bağlı bank sektoruna dəstəyin gücləndirilməsi, Azərbaycanda bu günə qədər həyata keçirdiyi layihələr, maliyyə institutları ilə sıx əməkdaşlıq və gələcəkdə yeni layihələrin həyata keçirilməsində əməkdaşlıq imkanları barədə məlumat verilib.
Görüşdə həmçinin, Mərkəzi Bank ilə AYİB arasında əməkdaşlıq münasibətlərinin inkişaf perspektvləri və prioritet sahələr üzrə texniki yardım istiqamətləri kimi məsələlər də müzakirə olunub.
