MÜDAFİƏ NAZİRLİYİ ORDU VƏ MƏTBUAT MÜNASİBƏTLƏRİNDƏN DANIŞDI.
04.09.2014 683 0.0 0

Akkreditə qaydalarının tətbiqi, hərbi mövzuda ixtisaslaşan jurnalistlər üçün seminarların, hərbi hissələrə səfərlərin təşkili, mətbuat konfranslarının keçirilməsi və digər fəaliyyətlər Müdafiə Nazirliyinin diqqət mərkəzindədir. 

"Biz sağlam tənqidin, düzgün iradın, məsuliyyət və peşəkarlığın tərəfdarıyıq, ancaq Ordu məsələsində qərəz, kin, ayrı-seçkilik yolverilməzdir. İnformasiyaların ötürülməsində hərbi xidmətin və müharibə şəraitinin xüsusiyyətləri, Müdafiə Nazirliyinin qapalı qurum olması və bir sıra digər amillər mütləq nəzərə alınmalıdır". Bunu Trend-in sorğusuna cavab olaraq Müdafiə Nazirliyinin mətbuat xidmətinin rəhbəri polkovnik Vaqif Dərgahlı deyib.

V.Dərgahlı qeyd edib ki, yayılan məlumatların monitorinqi bəzi media nümayəndələrinin bu məsələlərə qeyri-peşəkar yanaşmasını müəyyən edib: "Hərbi hissələrin nömrələri, təyinatı, dislokasiya yerlərinin göstərilməsi, xidməti təyinatlar və yerdəyişmələr barədə məlumatlarda şəxslər haqqında fərdi informasiyaların yayılmasının yolverilməzliyi dəfələrlə tövsiyə olunmasına baxmayaraq, bəzi media nümayəndələri hələ də bu praktikanı davam etdirirlər".

Mətbuat xidmətinin rəhbəri bununla bağlı bir neçə faktı misal göstərib: "Silahlı Qüvvələrin rəhbərliyi cəbhəyanı bölgədə kollegiya iclası keçirir. Təhlükəsizlik məsələləri nəzərə alınmaqla məlumatın bir gün sonra mətbuata ötürülməsi qərarına baxmayaraq, iclasdan az sonra bəzi mətbuat nümayəndələri məlumatı əldə edir və yayırlar. Cəbhədə əsgər şəhid olur. Araşdırma aparılır. Şəhidin valideynlərinə xəbər çatmadan onun adı və soyadı göstərilməklə məlumat yayılır. Bu da qəti surətdə yolverilməzdir. May ayında sosial şəbəkədə guya atəşkəsin pozulması və 4 şəhid verməyimizlə bağlı məlumat yayılmışdı. Araşdırma apardıq və məlumatda göstərilən 3 nəfərin ümumiyyətlə orduda xidmət etmədiyini müəyyən etdik. Digər 1 nəfərin isə ad, soyadı məlumatda göstərilənlə üst-üstə düşsə də, o şəxs başqa istiqamətdəki hərbi hissədə xidmət edirdi. Zirehli texnikanın planlı surətdə yerdəyişməsi və ya döyüş aviasiyamızın uçuşları həyata keçirilir. Amma texnikanın sayı, hərəkət istiqaməti və aviasiyanın foto və videosu bəzi elektron informasiya vasitələrində yayılır. Yenə də jurnalistlərin məlumatı əldə etmək üçün istinad etdikləri mənbə nazirlik deyil, yerli kənd sakinləri və anonim qaynaqlardır".

Müdafiə Nazirliyinin sözçüsü Ermənistan mənbələrində yer alan dezinformasiyaların Azərbaycan KİV-lərinə yol açması probleminə də toxunub: "Ermənistan mediası Ordumuz haqqında dezinformasiya yayır. Təəssüf ki, bəzi media vasitələri bu məlumatları olduğu kimi, heç bir dəqiqləşdirmə aparmadan, tərcümə edərək ölkə ictimaiyyətinə çatdırır. Bundan əlavə, peşəkarlıqdan və hərb işindən uzaq olan, ancaq özünü hərbi ekspert adlandıran bəzi şəxslərin Ordumuz, cəbhədəki vəziyyət və itkilər haqqında səsləndirdikləri qeyri-dəqiq məlumatlar da az qala həqiqət kimi qələmə verilir. Əksər hallarda isə Ermənistan mediasının bizə qarşı apardığı informasiya müharibəsində istifadə etdiyi xəbərlər bu ekspertlərin fikirləri ilə üst-üstə düşür".

V.Dərgahlı son günlərdə cəbhədə vəziyyətin gərginləşdiyi zaman informasiya məkanında xaotik, pərakəndə bir situasiyanın yaranmasının şahidi olduqlarını, qeyri-dəqiq, həqiqətdən uzaq, yalan, təhrif olunmuş, ictimaiyyəti çaşdıran, narahat edən, olduqca zərərli məlumatlar yayıldığını və bu informasiyanın qısa bir müddətdə media məkanını "işğal" etdiyini də xüsusi vurğulayıb: "Həmin günlərdə kütləvi informasiya vasitələrinin nümayəndələri sözün əsl mənasında səfərbər oldular. Onlar cəbhənin müxtəlif istiqamətlərinə göndərildi. Bu tədbirlər nəticəsində cəbhədəki real vəziyyət, Silahlı Qüvvələr haqqında obyektiv informasiya vaxtında ictimaiyyətə çatdırıldı. Fürsətdən istifadə edib media nümayəndələrinə bir daha minnətdarlığımı bildirirəm. Son dövrdə kütləvi informasiya vasitələrində Silahlı Qüvvələrin təbliğinə daha çox diqqət verilir. Şəhidlərimizin əsgəri ənənələrə uyğun olaraq son mənzilə yola salınması, vida mərasimlərində dövlət qurumları və ictimaiyyət nümayəndələri, millət vəkillərinin iştirakı, Milli qəhrəmanların və keçmiş döyüşçülərin anma mərasimlərinin keçirilməsi, döyüşlərdə fərqlənən hərbçilərə dövlət təltiflərinin təqdim edilməsi Silahlı Qüvvələrin şəxsi heyətinin döyüş ruhunu, düşmən üzərində qələbə əzmini daha da artırır".

 Jurnalistlər üçün seminarlar təşkil olunacaq

Daha sonra V.Dərgahlı Akkreditə qaydalarının tətbiqi, hərbi mövzuda ixtisaslaşan jurnalistlər üçün seminarların, hərbi hissələrə səfərlərin təşkili, mətbuat konfranslarının keçirilməsi və digər fəaliyyətlər Müdafiə Nazirliyinin diqqət mərkəzində olduğunu bildirib.

Mətbuat xidmətinin rəhbəri qeyd edib ki, son dövrlərdə Müdafiə Nazirliyi ilə kütləvi informasiya vasitələri arasında əlaqələr xeyli genişləni: "Nazirliyin rəhbərliyi mətbuatla münasibətlərin dövlət sirlərinin qorunmasını təmin etməklə qarşılıqlı anlaşma, şəffaflıq və dəqiqlik prinsipləri əsasında qurulmasını qarşımızda prioritet vəzifə kimi qoyub. Rəsmi internet səhifəmizdə hər gün bir neçə dəfə Silahlı Qüvvələrin fəaliyyəti barədə informasiyalar yayılır".

V.Dərgahlı əmin edib ki, Müdafiə Nazirliyi bundan sonra da media ilə qarşılıqlı münasibətlərini Ordumuzun daha da güclənməsi, Ermənistan-Azərbaycan, Dağlıq Qarabağ münaqişəsinin həlli istiqamətində quracaq və bütün gücünü səfərbər edəcək ki, ölkəmizin ərazi bütövlüyü təmin edilsin: 

"Müdafiə Nazirliyi ilə Mətbuat Şurasının bu yaxınlarda keçirilən görüşü, deputatlar, ictimaiyyət və media nümayəndələrinin cəbhəyə səfərləri kimi tədbirlər bundan sonra da davam edəcək və əməkdaşlığımız daha da genişlənəcəkdir. Sentyabrın 1-də şəxsi heyətlə iş üzrə zabitlərin təkmilləşdirmə kursunu başa vuran bir qrup hərbi qulluqçunun ilk buraxılışı olub. Bu zabitlər kütləvi informasiya vasitələri ilə necə işləmək və münasibətləri hansı formada qurmaq mövzusunda da bilik və təcrübəyə yiyələniblər".//Trend

 

Teqlər:MÜDAFİƏ NAZİRLİYİ ORDU VƏ MƏTBUAT M

Digər xəbərlər:
Bu gün xəbər əlavə olunmayıb.
Şərhlər
avatar