Zaqatala rayonunda Milli Qəhrəmanın ailəsinə fərdi yaşayış evi təqdim olunub- FOTO
10.11.2017 328 0.0 0

Azərbaycan Respublikasının Əmək və Əhalinin Sosial Müdafiəsi Nazirliyi tərəfindən Zaqatala rayonunun Dağlı kəndində inşa etdirilmiş müasir tələblərə uyğun fərdi yaşayış evi Azərbaycanın Milli Qəhrəmanı Natiq Məmmədovun ailəsinə təqdim edilib.

Qazeta.info bildirir ki, Evin təqdim olunması tədbirində vurğulanıb ki, Azərbaycan Respublikasının Prezidenti cənab İlham Əliyevin uğurlu sosial siyasəti ölkəmizin ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərin və şəhid ailələrinin də etibarlı sosial müdafiə sistemi ilə əhatə olunmalarına şərait yaradıb. Ölkəmizdə uğurla davam etdirilən mühüm sosial proqramlardan biri də həmin təbəqələrdən olan vətəndaşların sosial-məişət şəraitinin yaxşılaşdırılmasına, onların yeni mənzillərlə təminatına yönəlib. Əmək və Əhalinin Sosial Müdafiəsi Nazirliyi tərəfindən indiyədək 5 min 560 nəfər imtiyazlı şəxs mənzillə təmin edilib ki, onlardan 5,1 min nəfəri Qarabağ müharibəsi əlili və şəhid ailəsi, qalanları İkinci Dünya müharibəsi əlilləri, Çernobıl AES əlilləri, müharibə əlillərinə bərabər tutulan digər vətəndaşlar, gözdən əlillərdir. Hazırda bu təbəqələrdən olan vətəndaşlar üçün ölkəmizin rayon və şəhərlərində fərdi və çoxmənzilli evlərin tikintisi, yeni inşa edilmiş binalardan  mənzillərin alınaraq təmir olunması işləri davam etdirilir.

Ölkəmizin müstəqilliyi, ərazi bütövlüyü uğrunda mübarizədə böyük rəşadət və misilsiz vətənpərvərlik nümunəsi göstərərək Azərbaycanın Milli Qəhrəmanı adına layiq görülmüş şəxslərin və həlak olmuş Milli Qəhrəmanlarımızın ailələrinin də mənzillə təminatı yüksək səviyyədə həyata keçirilir. Eyni zamanda, onların digər sahələrdə sosial təminatı daim gücləndirilir. Azərbaycanın Milli Qəhrəmanı adı verilmiş şəxslərə (onlardan həlak olanların isə ailələrinə) Azərbaycan Respublikası Prezidentinin aylıq təqaüdü ödənilir. Dövlət başçısının 11 oktyabr 2016-cı il tarixli Fərmanı ilə bu təqaüdün məbləği ötən il növbəti dəfə artırılaraq 1000 manatdan 1300 manata çatdırılıb.

Həmçinin ölkəmizin ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərin və şəhid ailələrinin hər bir uşağı aylıq sosial müavinətlə, eləcə də əmək pensiyası almaq hüququ olmayan şəhid ailəsi üzvləri kommunal, nəqliyyat və digər xidmətlər üçün aylıq sosial müavinətlə təmin edilir. Qarabağ müharibəsi əlilləri və şəhid ailələrinin respublikamızın ali təhsil müəssisələrində bakalavriat və magistratura, Azərbaycan Milli Elmlər Akademiyasının magistratura səviyyəsində və habelə orta ixtisas təhsili müəssisələrində ödənişli əsaslarla təhsil alan övladlarına da Prezident qayğısı olaraq, onların təhsil müddəti ərzində təhsil haqqı dövlət büdcəsinin vəsaiti hesabına ödənilir.

Tədbirdə dövlətçiliyimiz uğrunda böyük qəhrəmanlıq göstərərək  şəhidlik zirvəsinə ucalmış və Azərbaycanın Milli Qəhrəmanı adına layiq görülmüş Natiq Məmmədovun həyat və döyüş yolunun əsl vətənpərvərlik nümunəsi olduğu vurğulanıb.

Yeni mənzillə təmin olunan ailənin üzvləri onların hərtərəfli təminatı üçün aparılan işlərdən razı qaldıqlarını bildirib,  müasir tələblər səviyyəsində tikilmiş yeni yaşayış evi ilə təmin olunduqlarına görə Azərbaycan Prezidenti cənab İlham Əliyevə dərin minnətdarlıqlarını ifadə ediblər.

 

 

 

 

 


Digər xəbərlər:
Bu gün xəbər əlavə olunmayıb.
Şərhlər
avatar