Nərimanov Rayon Polis İdarəsi 18-ci Polis Bölməsinin əməkdaşları oğurluqların qarşısının alınması istiqamətində növbəti əməliyyat-axtarış tədbiri həyata keçirib. Məlumata görə, təkcə Nərimanov rayonu ərazisində 7 mənzili qarət etməkdə təqsirli bilinən Gədəbəy rayon sakini Araz Hüseynovsaxlanılıb. O, oğurluqları təkbaşına və gecə saatlarında həyata keçirib. Əsasən həyət evlərindən oğurluq edən Araz Hüseynov mənzillərə işıq sönən zaman daxil olub. Dediyinə görə evdə kiminsə olması onu qorxutmayıb.
"Nərimanovda 7 mənzili qarət etmişəm. Əlimə nə keçdi, götürmüşəm. Bundan başqa Yasamal və Abşeron rayonlarında da oğurluq etmişəm".
Araşdırma zamanı bu şəxsin təkcə Bakı şəhər sakini Mirzə Axundova məxsus evdən 5500 manat pul və sənəd oğurladığı məlum olub. Əvvəllər məhkum olunan Araz Hüseynovun peşəkar oğru olduğu deyilir.
Onun əməllərindən zərərçəkən başqa vətəndaşların Daxili İşlər Nazirliyinin “102” zəng mərkəzinə, Nərimanov RPİ-nə və ya 18-ci Polis Bölməsinə müraciət etmələri xahiş olunur. /apa/
