Rusiyanın Kalininqrad vilayətində Polşa ilə sərhəddə Azərbaycan vətəndaşı saxlanılıb. Saxlanılan şəxs Rusiya Federasiyası Dövlət sərhədini qeyri-qanuni keçərək Fransaya yollanmaq niyyətində olub.
32 yaşlı azərbaycanlı Baqration rayonunun Şirokoye qəsəbəsində saxlanılıb, deyə Rusiya Federal Təhlükəsizlik Xidmətinin Sərhəd İdarəsinin mətbuat xidmətindən bildiriblər.
"Saxlanılan şəxsin şəxsi əşyalarına baxış nəticəsində onun dövlət sərhədini qeyri-qanuni yolla keçməyə hazırlaşdığı aydın olub", —deyə Sərhəd xidmətindən bildiriblər.
Belə ki, onun üzərində xarici valyuta, Rusiya və MDB avtomobil yollarının xəritəsi, bir neçə bıçaq, mobil telefonlar və Rusca-Fransızca danışıq kitabçası aşkar edilib.
Hazırda Sərhəd zonasına müvafiq sənədlər olmadan daxil olduğuna görə Azərbaycan vətəndaşı Rusiya qanunvericiliyinə uyğun olaraq məsuliyyətə cəlb edilməsi məsələsinə baxılır./anspress/
