Tarix: 05.12.2016,   Saat: 00:20, Bazar ertəsi.          

İstintaq təcridxanasında qiyam olub? - Rəsmi açıqlama

Ədliyyə Nazirliyinin Penitensiar Xidməti Bakı İstintaq Təcridxanasında və bəzi cəzaçəkmə müəssisələrində məhkumların qanunazidd hərəkət etməsi və nəticədə qarşıdurma yaranması barədə yayılan məlumatlar haqda açıqlama yayıb.

Qazeta.info xəbər verir ki, Ədliyyə Nazirliyinin mətbuat xidmətinin məlumatında bildirilir ki, son günlərdə bəzi kütləvi informasiya vasitələrində Ədliyyə Nazirliyinin Penitensiar xidmətinin tabeçiliyində olan ayrı-ayrı müəssisələrdə, o cümlədən 13 və 6 saylı cəzaçəkmə müəssisələrində, Bakı İstintaq təcridxanasında məhkumlara qarşı qanuna zidd hərəkətlərin törədilməsi, cəza çəkənlər arasında kütləvi iğtişaşların baş verməsi, müəssisələrə xüsusi təyinatlı dəstələrin yeridilməsi, məhkumlardan, eləcə də onlara baş çəkən qohumlarından pul tələb edilməsi kimi həqiqəti əks etdirməyən məlumatlar dərc edilir. 

Bundan başqa, Penitensiar xidmətin rəhbərliyi və kollektivi bu kimi böhtan xarakterli və qərəzli məlumatların son zamanlar xidmətdə aparılan müsbət işlərə kölgə salmaq, əhalidə çaşqınlıq, cəza çəkənlər və onların yaxın qohumları arasında əsassız narahatçılıq yaratmaq məqsədi daşıdığını bildirib. 

Yayılan məlumatda, Penitensiar xidmət bir daha ictimaiyyətin və kütləvi informasiya vasitələrinin nəzərinə çatdırıb ki, bu gün haqqın.az və virtualaz.org saytlarında “Bakı istintaq təcridxanasında qiyam: qoşun yeridildi” başlıqlı məlumatın heç bir əsası yoxdur və böhtan xarakterlidir, tabeçilikdə olan cəzaçəkmə müəssisələrində və istintaq təcridxanalarında əməliyyat şəraiti sabitdir, tam nəzarət altındadır, cəzaların icrası və çəkilməsi qaydalarına, mövcud qanunvericiliyin tələblərinə tam uyğun şəkildə riayət olunur. 



  Bölmə: Manşet | Baxış sayı: 439 | Tarix: 21.10.2016, 13:14


Xəbərlər