DEPUTATLAR ANKARADA YARALI ƏSKƏRLƏRİMİZİ ZİYARƏT ETDİ.
28.08.2014 1304 0.0 0

 

Deputatlar Ankarada müalicə alan yaralı əskərlərimizi ziyarət edib.

 

Yeni Azərbaycan Partiyasını təmsil edən deputatlar - YAP icra katibinin müavini, Milli Məclisin deputatı Siyavuş Novruzov, YAP İdarə Heyətinin üzvü, Milli Məclisin aqrar siyasət komitəsinin sədri Eldar İbrahimov, YAP Nəsimi rayon təşkilatının sədri, Milli Məclisin deputatı Məlahət İbrahimqızı Ankarada müalicə olunan yaralı əsgərlərimizi ziyarət ediblər.
Əsgərlərə tezliklə sağalmağı arzulayan deputatlar Vətənimizin müdafiəsində göstərdikləri şücaətə görə onlara minnətdarlıqlarını bildiriblər.
Səmimi salamlarının Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevə çatdırılmasını xahiş edən əsgərlərimiz qeyd ediblər ki, burada onların müalicəsi ilə bağlı bütün şərait yaradılıb və bundan sonra da Vətənimizin müdafiəsi üçün döyüşməyə hazırdırlar. Azərbaycan və Türkiyə ictimaiyyətinin nümayəndələri, o cümlədən dövlət rəsmiləri tərəfindən ziyarət edilmələrini ölkəmizə və dövlətimizə rəğbətin göstəricisi olduğunu bildirən əsgərlərimiz cəbhə yoldaşlarının, eləcə də gələcəkdə Vətənimizin keşiyində dayanacaq gənclərin düşmənə layiqli cavab verəcəklərini vurğulayıblar.
Mübarizə hələ qarşıdadır deyən Ədalət Məmmədov bildirib ki, düşmənin xain hücumu nəticəsində bir neçə hərbiçimizin şəhid olması və yaralanması Azərbaycan əsgərlərinin düşmənə qarşı mübarizə əzmini daha da artırıb.
Sovet İttifaqı Qəhrəmanı Qəzənfər Əkbərovun nəvəsi Elvin Əsgərov torpaqlarımızın müdafiəsi zamanı əsgər yoldaşlarının göstərdikləri qəhrəmanlıqları ömrünün sonunadək qürurla xatırlayacağını və Azərbaycan döyüşçülərindəki ruh yüksəkliyini düşmən üçün hər zaman sarsıdıcı olduğunu bildirib.
Vətənimizin ərazi bütövlüyü uğrunda döyüşməyin şərəfli vəzifə olduğunu bildirən Sərxan Tahirzadə göstərilən diqqət və qayğını Azərbaycan dövlətinin onların timsalında bütün hərbi qulluqçularımıza olan yüksək münasibəti kimi dəyərləndirib.
Xatırladaq ki, təcavüzkar Ermənistanın hərbi birləşmələrinin hücumları zamanı yaralanmış Azərbaycan Silahlı Qüvvələrinin üç əsgəri - Ədalət Məmmədov, Elvin Əsgərov və Sərxan Tahirzadə avqustun 9-da təyyarə ilə Türkiyəyə müalicəyə gətiriliblər.//
AzərTAc


Teqlər:DEPUTATLAR TÜRKİYƏDƏ YARALI ƏSKƏRLƏ

Digər xəbərlər:
Şərhlər
avatar