Akif Çovdarovun məhkəməsində şahidlər ifadə verib - YENİLƏNİB
22.02.2017 806 0.0 0

Ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarovun və digərlərinin cinayət işi üzrə məhkəmə prosesi Sabunçu Rayon Məhkəməsində bu gün fasilədən sonra davam etdirilib.

 

APA-nın xəbərinə görə, Bakı Hərbi Məhkəməsinin sədri Həbib Həsənovun sədrliyi ilə keçirilən prosesdə MTN-nin keçmiş əməkdaşı Alı Nəbiyev şahid qismində ifadə verib.

 

O bildirib ki, Cahangir Alışov və digər zərərçəkmiş şəxslərdən Akif Çovdarovun adından pul almayıb, onların dedikləri həqiqəti əks etdirmir.

 

Daha sonra iclasda şahid qismində A. Çovdarovun sürücüsü olmuş Nurxan Atakişiyev ifadə verib. O, da C. Alışovun dediklərini təkzib edib. Bildirib ki, C. Alışov onun adına ev rəsmiləşdirməyib, belə bir müqavilə yoxdur.

 

Sonra iclasda şahid qismində A. Çovdarovun dostu Adil Yaqubov ifadə verib. Bildirib ki, Masazırda yaradılan balıqçılıq təsərrüfatı A. Çovdarovun kürəkəni Rövşən Qasımova məxsus olub: "Biz Cahangir Alışovdan iki iş icraçısı göndərməsini xahiş etmişdik. Həmin şəxslərdən biri 6 min manat pul oğurlamışdı. Bunu biləndən sonra Cahangir həmin ziyanın əvəzində 4 min manatlıq material göndərdi. Bunu öz istəyi ilə edib. Heç kim nəsə tələb etməyib və Cahangir oraya 250 min manat xərcləməyib".

 

Proses fevralın 27-də davam edəcək.

 

*****

Sabunçu Rayon Məhkəməsində ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin həbsdə olan sabiq rəisi, general-mayor Akif Çovdarovun və digərlərinin cinayət işi üzrə məhkəmə prosesi davam etdirilib.


Məlumata görə, Bakı Hərbi Məhkəməsinin sədri Həbib Həsənovun sədrliyi ilə keçirilən prosesdə A. Çovdarovun vəkilləri zərərçəkmiş şəxslərdən Cahangir Alışovla bağlı KİV-də yazılan məlumatları məhkəməyə təqdim ediblər.


A. Çovdarovun vəkili Sadiq Rəsulov jurnalistlərə açıqlamasında deyib ki, həmin yazılar C. Alışovun dələduzluq əməlləri ilə bağlı olub: "Biz xahiş etdik ki, həmin məlumatlar məhkəmə hökm çıxaran zaman Cahangir Alışovun şəxsiyyətini müəyyənləşdirmək üçün nəzər alınsın. Daha sonra iclasda şahidlər ifadə verdi. Cəfər Cəfərzadə adlı şahid bildirdi ki, bir nəfərə məxsus mənzil Cahangir Alışova satılıb. Əvəzində isə Cahangir həmin şəxsə iki mağaza verib. Həmin faktı Cahangir Alışov da təsdiq etdi.

Daha sonra iclasda Akif Çovdarovun kürəkəninin bacısı Təranə Əmircanova ifadə verdi. O bildirdi ki, "Yüksəliş" MTK-dan 117 min manata ev alıb. Evin pulunu qardaşına verib. Şirkətin əməkdaşı Samir adlı şəxs isə onların evinin yanına gəlib və orada müqavilə bağlanıb. Bir neçə gün sonra qardaşı ödəniş qəbzini gətirib ona verib. İttiham aktınada göstərilir ki, həmin ev hədə-qorxu ilə verilib, lakin Təranə Əmircanova bunu təkzib etdi". 

S. Rəsulov müvəkkilinin səhhətində problemlər olduğunu da deyib.


Proses günün ikinci yarısında davam edəcək.
Qeyd edək ki, təqsirləndirilən şəxslər - Akif Çovdarova Cinayət Məcəlləsinin 145.3 (Qanunsuz azadlıqdan məhrumetmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israfetmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədilə törədildikdə), 182.3.1, 182.3.2 (Hədə-qorxu ilə tələbetmə külli miqdarda əmlak əldə etmək məqsədilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri, Səlim Məmmədova həmin Məcəllənin 145.3, 179.3.1, 179.3.2, 181.3.1, 181.3.2, 182.3.1, 182.3.2, 302.1, 302.2, 311.3.1, 311.3.2, 311.3.3, 311.3.4, 313, 341.2.1, 341.2.2 və 341.2.3-cü maddələri, Akif Əliyevə həmin Məcəllənin 145.3, 179.3.1, 179.3.2, 181.3.1, 181.3.2, 182.3.1, 182.3.2, 302.2, 311.3.1, 311.3.2, 311.3.3, 311.3.4, 313, 341.2.1, 341.2.2 və 341.2.3-cü maddələri və Orxan Osmanova isə həmin Məcəllənin 145.3, 181.3.1, 181.3.2, 182.3.1, 182.3.2, 302.2, 311.3.1, 311.3.2, 311.3.3, 311.3.4, 341.2.1, 341.2.2 və 341.2.3-cü maddələri ilə yekun ittihamlar irəli sürülüb.


Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər Akif Çovdarov, Səlim Məmmədov, Akif Əliyev və Orxan Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub./APA/


Digər xəbərlər:
Bu gün xəbər əlavə olunmayıb.
Şərhlər
avatar